تاپسی پانو کا نواز الدین صدیقی کے ہمراہ کام کرنے سے انکار

بولی وڈ کی خوبرو اداکارہ تاپسی پانو نے کاسٹنگ ڈائریکٹر ہنی تریہن کی کرائم تھریلر میں نواز الدین صدیقی کے ساتھ کام کرنے سے انکار کردیا ہے۔

غیر ملکی میڈیا کے مطابق ہنی تریہن اس کرائم تھریلر میں نواز الدین صدیقی کے ساتھ ایک بہترین مرکزی اداکارہ کو کاسٹ کرنے کی خواہش رکھتے ہیں اور اسی سلسلے میں انہوں نے تاپسی پانو سے بھی رابطہ کیا لیکن انہوں نے انکار کردیا۔

کاسٹنگ ڈائریکٹر ہنی تریہن فلم ‘رئیس’ اور ‘تلوار’ کے بعد ایک اور کرائم تھریلر فلم بنارہے ہیں جس میں نواز الدین صدیقی نے اپنی متاثر کن اداکاری کی بدولت مرکزی کردار حاصل کرلیا ہے تاہم جب مرکزی اداکارہ کے لئے تاپسی پانو سے رابطہ کیا گیا تو انہوں نے نواز الدین صدیقی کے ساتھ کام کرنے سے انکار کردیا۔

یاد رہے تاپسی پانو آنے والے دنوں میں ‘ملک’، ‘سورما’ اور ‘من مرضیاں’ جیسی فلموں میں جلوہ گر ہوں گی۔