ریپ کیسز پر امیتابھ کا تبصرے سے انکار، پوجا بھٹ کی تنقید
واضح رہے کہ امیتابھ بچن، بھارتی حکومت کی جانب سے شروع کیے گئے پروگرام ‘بیٹی پڑھاؤ، بیٹی بچاؤ’ مہم کا بھی حصہ ہیں، گذشتہ دنوں اُن سے حالیہ ریپ کیسز کے حوالے سے سوال کیا گیا، جس پر انہوں نے کہا، ‘اس بارے میں بات کرنے سے بھی مجھے گھن آتی ہے، لہذا اس معاملے کو مت اچھالیں۔’
Even discussing this issue feels disgusting, don’t bring up this issue. It is terrible to even talk about it: Amitabh Bacchan on being asked about his views on rapes in the country as an ambassador of ‘Beti Bachao-Beti Padhao’ (ANI) pic.twitter.com/ongGXlZJtz
— NDTV (@ndtv) April 19, 2018
سوشل میڈیا پر بہت سے لوگوں نے اس معاملے پر بات نہ کرنے پر امیتابھ بچن کو تنقید کا نشانہ بھی بنایا اور ان ہی میں سے ایک پوجا بھٹ بھی ہیں۔
اداکارہ اور فلمساز پوجا بھٹ نے سماجی رابطے کی ویب سائٹ ٹوئٹر پر اپنے پیغام میں اس معاملے پر بات نہ کرنے پر فلم ‘پنک’ کا حوالہ دیا، جس میں امیتابھ بچن نے ایک ایسے وکیل کا کردار ادا کیا تھا، جو جنسی تعلقات کے حوالے سے خواتین کی رضامندی کے حق کا دفاع کرتا ہے اور ان کا کیس جیتنے میں اہم کردار ادا کرتا ہے۔
پوجا نے امیتابھ بچن کی تصویر اور ان کا مذکورہ بیان شیئر کرتے ہوئے لکھا، ‘اس موقع پر میں فلم ‘پنک’ کو یاد کیے بغیر نہیں رہ سکتی، کیا اسکرین پر نظر آنے والا ہمارا عکس اصل زندگی میں نظر نہیں آسکتا؟’
I can’t help being reminded of a film called #Pink. Can our images on screen please be reflected in reality? ? https://t.co/JHnc8PLDXY
— Pooja Bhatt (@PoojaB1972) April 20, 2018
لیکن معاملہ یہیں پر ختم نہیں ہوا، بلکہ اس ٹوئیٹ کے بعد لوگوں نے پوجا بھٹ کی ذاتی زندگی پر بھی تنقید شروع کردی اور ٹوئٹر پر ان کی الکوحل (شراب) کی عادت کا مذاق اڑانا شروع کردیا۔
واضح رہے کہ ماضی میں پوجا بھٹ الکوحل کی عادی تھیں، تاہم اب انہوں نے اپنی اس عادت سے چھٹکارا پالیا ہے اور دسمبر 2016 سے وہ الکوحل اور نشے سے بالکل دور ہیں۔
ایک ٹوئٹر صارف نے پوجا کو تنقید کا نشانہ بناتے ہوئے کہا کہ ایک شراب کی عادی خاتون شہرت حاصل کرنے کے لیے ایک لیجنڈ کا نام استعمال کر رہی ہیں۔
A ‘recovering’ alcoholic & proud of it!In a country where people don’t even acknowledge they have a drinking problem,let alone discuss it I am grateful to stand away from the crowd that considers holding your frailties to light shameful. #485dayssober ?? pic.twitter.com/xDDFW0rD2j
— Pooja Bhatt (@PoojaB1972) April 22, 2018
جس پر پوجا نے جواباً تصحیح کی اور لکھا، ‘ایک ایسی خاتون جو الکوحل کی لت سے باہر نکل چکی ہے اور مجھے اس پر فخر ہے’، ساتھ ہی انہوں نے لکھا کہ ‘ایک ایسے ملک میں جہاں لوگوں کو اس بات کا بھی احساس نہیں ہوتا کہ انہیں پینے پلانے کی لت لگ چکی ہے، میں بہت شکر گزار ہوں کہ میں اس سے دور ہوگئی ہوں’۔
واضح رہے کہ رواں برس 17 جنوری کو مقبوضہ کشمیر کے علاقے کٹھوا میں ایک 8 سالہ بچی آصفہ بانو کو اجتماعی زیادتی کے بعد بہیمانہ انداز میں قتل کردیا گیا تھا۔
اس ظلم و زیادتی پر عامر خان، انوشکا شرما اور کرینہ کپور سمیت بالی وڈ کے متعدد اسٹارز نے غم و غصہ کا اظہار کیا ہے۔
دوسری جانب بھارتی ریاست اترپریش میں حکمران جماعت بھارتیہ جنتا پارٹی (بی جے پی) کے رکن اسمبلی کلدیپ سنگھ سینگار کو بھی ایک لڑکی سے زیادتی کے الزامات کا سامنا ہے۔
جنسی زیادتی کے ان حالیہ واقعات پر نریندر مودی کی حکومت کو شدید تنقید کا سامنا ہے اور مختلف شعبہ زندگی سے تعلق رکھنے والے لوگ اس پر احتجاج کر رہے ہیں۔