رنبیر نے مان لیا کہ وہ عالیہ کے بوائے فرینڈ ہیں

بالی وڈ اداکار رنبیر کپور نے آخر کار تسلیم کر ہی لیا کہ وہ عالیہ بھٹ کو ڈیٹ کر رہے ہیں اور عالیہ تو پہلے ہی رنبیر کے لیے اپنی پسند ظاہر کر چکی ہیں۔

جی کیو میگزین کے ساتھ انٹرویو میں جب رنبیر سے سوال کیا گیا کہ کیا آپ عالیہ بھٹ کو ڈیٹ کر رہے ہیں تو انھوں نے اقرار کرتے ہوئے کہا کہ ابھی یہ سب کچھ ابتدائی مراحل میں ہے اور وہ اس رشتے کو کچھ وقت دینا چاہتے ہیں۔

رنبیر نے عالیہ کی تعریف کرتے ہوئے کہا کہ وہ بطور اداکارہ اور انسان ان سے متاثر ہیں اور ابھی اس رشتے کو اور آگے بڑھنے دیں گے۔ رنبیر اس سے پہلے دیپکا پاڈوکون اور مبینہ طور پر قطرینہ کیف کے ساتھ رشتے میں رہ چکے ہیں۔

ان کے اس نئے رشتے کو پھلنے پھولنے میں جتنا بھی وقت لگے اصل سوال یہ ہے کہ یہ رشتہ چلے گا کتنا؟

اُدھر رنبیر کی سابق ‘دوست’ دیپکا جو مبینہ طور پر رنویر سنگھ کے ساتھ اپنی زندگی میں آ گے بڑھ چکی ہیں، مبینہ طور پر شادی کی تیاریاں کر رہی ہیں۔

دیپکا تو شادی کے سوالوں کو گول کر جاتی ہیں لیکن نٹ کھٹ اور بے چین رنویر خود کو روک نہیں پاتے اور اِدھر اُدھر دیپکا سے اپنی شادی کے اشارے دیتے پھرتے ہیں۔

حال ہی میں انھوں نے اپنے ایک فلمی دوست سے واضح طور پر کہا کہ اس سال ان کی اور دپیکا کی شادی طے ہے۔ انوشکا اور ویراٹ کی شادی اور اب رنبیر اور عالیہ کے رشتے کے رسمی اقرار کے بعد بالی وڈ شائقین کو اس نئی خوش خبری کا انتظار رہے گا۔

سلمان خان کا یہ فلمی مکالمہ کہ ‘ایک بار میں کمٹمنٹ کردوں تو پھر میں اپنے آپ کی بھی نہیں سنتا’ ان کی اصل زندگی میں بھی لاگو ہوتا ہے۔

سلمان دشمنی کے ساتھ ساتھ دوستی نبھانے میں بھی ماہر ہیں اور اس بار وہ اپنے بچپن کے دوست اقبال کے بیٹے ظہیر اقبال کو لانچ کر رہے ہیں۔ سلمان کا کہنا ہے کہ ظہیر اقبال نے ہمیشہ ان کی مدد کی تھی اور آج وہ ان کے بیٹے کو لانچ کر کے اپنے دوست کا قرض ادا کر رہے ہیں۔

دراصل بدھ کے روز اپنی ٹویٹ میں سلمان نے ظہیر کے بچپن کی تصویر شائع کی جس میں وہ سلمان کی گود میں ہیں اور لکھا کہ اس جمعرات کو وہ ایک نئے اداکار کو لانچ کرنے والے ہیں۔

سلمان کی اس ٹویٹ کے بعد قیاس آرائیاں شروع ہو گئیں کہ وہ کون ہے کس کا بیٹا ہے اور پھر جمعرات کو ظہیر کی تازہ تصویر کے ساتھ سلمان نے لکھا کہ وہ نیا چہرہ جس کو وہ لانچ کر رہے ہیں دراصل ظہیر ہے۔

سلمان اپنی پروڈکشن کمپنی کے تحت نئی فلم شروع کرنے جا رہے ہیں جس کا نام ابھی طے نہیں ہوا۔ ظہیر پہلے فرد نہیں جنھیں سلمان خان کی سرپرستی حاصل ہو رہی ہے۔

اس سے پہلے وہ اپنے کئی دوستوں کے بچوں کو لانچ کر چکے ہیں جن میں سورج پنچولی، عطیہ شیٹی اور ارجن کپور جیسے فلمی بچے شامل ہیں۔ یعنی سلمان بالی وڈ میں اقربا پروری کی جیتی جاگتی مثال ہیں۔