سلمان خان کی بیرون ملک روانگی عدالتی اجازت سے مشروط

بولی وڈ کے بھائی سلمان خان کی بیرونِ ملک روانگی ایک سوالیہ نشان بن گئی۔ جودھ پور کی عدالت نے سلمان خان کی بیرون ملک روانگی عدالت کی اجازت سے مشروط کردی۔

غیرملکی میڈیا رپورٹس کے مطابق سلمان خان کے خلاف بھارتی ریاست راجستھان کے علاقے جودھ پور کی مقامی عدالت میں کالے ہرن کے غیر قانونی شکار کا کیس 1998 سے چل رہا ہے۔

اب سے چند ماہ قبل ہی اس کیس میں دبنگ خان کو 5 سال قید اور 10 ہزار روپے جرمانے کی سزا سنائی گئی تھی لیکن صرف 2 روز جیل میں گزارنے کے بعد ہی انہیں ضمانت پر رہائی مل گئی تاہم عدالت سے ان کے بیرون ملک جانے پر پابندی عائد کردی تھی۔

بعد ازاں فلم ‘ریس تھری’ کی عکسبندی کے لئے سلمان خان نے عدالت سے بیرون ملک جانے کی اجازت طلب کی تھی، جس پر عدالت نے ان پر سے پابندی ختم کردی تھی۔

کچھ روز قبل ہی سلمان خان نے امریکا کا دورہ بھی کیا اور وہاں مختلف ایونٹس میں شرکت کی۔

ہفتے کو جودھ پور کی مقامی عدالت میں ایک بار پھر کالے ہرن کے غیر قانونی شکار سے متعلق کیس کی سماعت ہوئی جس میں دبنگ خان کے بیرون ملک جانے پر ایک بار پھر پابندی عائد کردی گئی ہے۔

اس کے علاوہ عدالتی حکم نامے میں یہ بھی کہا گیا ہے کہ سلّو میاں کو ہر مرتبہ برون ملک جانے سے قبل عدالت سے اجازت لینا ہوگی۔