سلمان خان کی فلم ’ریڈی‘ کا سیکوئل بنانے کی تیاری

سلمان خان کی مصروفیت کو مدنظر رکھتے ہوئے شوٹنگ شروع کرنے کا فیصلہ کیا جائے گا، انیس بزمی

 ممبئی: بالی ووڈ کے سلطان سلمان خان کی کامیڈی فلم ’ریڈی‘ کا پہلا سیکوئل بنانے کی تیاریاں شروع کردی گئی ہیںَ 

بالی ووڈ میں آج کل نئی فلموں کے بجائے پرانی ہی فلموں کے سیکوئل بنانے کا رواج عام ہو گیا ہے اور اس زمرے میں کامیڈی فلموں کو خصوصی اہمیت حاصل ہے کیوں کہ مداحوں کی جانب سے ایسی فلموں کو کافی پزیرائی دی جاتی ہے یہی وجہ ہے کہ آج ’ہاؤس فل‘، ’گول مال‘ اور ’دھمال‘ ایک کامیاب فرنچائز بن چکی ہیں جب کہ سلمان خان بھی اس ڈگر پر چل پڑے ہیں۔

بھارتی میڈیا رپورٹس کے مطابق انیس بزمی کی ہدایتکاری میں بننے والی فلم ’ریڈی‘ کی کامیابی کے بعد فلم کا سیکوئل بنانے کی تیاریاں کی جارہی ہیں جس کی تصدیق فلمساز بھوشن کمار نے کردی ہے۔

بھوشن کمار کا کہنا تھا کہ فلم کا سیکوئل بنانے کا حتمی فیصلہ کر لیا گیا ہے اور اس حوالے سے انیس بزمی اور سلمان خان سے بات چیت کا سلسلہ جاری ہے جب کہ فلم میں مرکزی کردار ادا کرنے والی معروف اداکارہ آسین کو سیکوئل میں ایک بار پھر کاسٹ کیا جائے گا۔

دوسری جانب انیس بزمی کا کہنا ہے کہ وہ فلم ’ریڈی‘ کے سیکوئل کو لیکر کافی خوش ہیں اور اس پر کام کرنے کے لئے مزید انتظار نہیں کرسکتے جب کہ پروڈیوسر اور ہمارے درمیان فلم کو لیکر کافی گفتگو بھی ہو چکی ہے تاہم فلم کی تاریخ ،شوٹنگ اور دیگر معاملات کو سلمان خان کی مصروفیات کو مدنظر رکھ کر طے کیا جائے گا۔

واضح رہے کہ 2011 میں 40 کروڑ کے بجٹ سے بننے والی فلم ’ریڈی‘ میں سلمان خان مد مقابل آسین نے مرکزی کردار ادا کیا تھا جب کہ فلم نے بھارت میں 100 کروڑ روپے سے زائد کا بزنس کیا تھا۔