عالیہ بھٹ کی بہن کی متعدد مرتبہ خودکشی کی کوشش
بولی وڈ ہدایت کار مہیش بھٹ کی بیٹی عالیہ بھٹ اس وقت بولی وڈ کی کامیاب ترین اداکاراؤں میں سے ایک ہیں، تاہم کوئی نہیں جانتا کہ مہیش بھٹ کی دوسری بیٹی اور عالیہ بھٹ کی بہن شاہین بھٹ نے اپنی زندگی کا ایک طویل عرصہ ڈپریشن میں مبتلا ہوکر گزار دیا۔
اس بات کا انکشاف شاہین بھٹ نے ووگ انڈیا میں لکھے اپنے ایک مضمون میں کیا۔
شاہین نے بتایا کہ وہ 12 سال کی عمر سے ڈپریشن سے لڑتی رہیں، جبکہ وہ اپنی زندگی میں ایک سے زائد مرتبہ خودکشی کرنے کی کوشش بھی کرچکی ہیں۔
شاہین نے اپنے مضمون کا آغاز مقبول امریکی شیف انتھونی بورڈین کی اچانک موت پر افسوس کا اظہار کرنے سے کیا اور لکھا کہ وہ بھی اپنے ماضی میں ڈپریشن میں مبتلا رہیں، اور وہ بھی اس طرح ہی اپنی زندگی ختم کرسکتی تھیں۔
شاہین نے بتایا کہ وہ جب بھی کسی کی خودکشی کی خبر پڑھتی ہیں تو وہ دل برداشتہ ہوجاتی ہیں۔
انہوں نے مزید کہا کہ ’میں 12 سال کی عمر سے ڈپریشن میں مبتلا ہوں، میں ایک سے زائد مرتبہ خودکشی کرنے کی کوشش کرچکی ہوں، میں جانتی ہوں کہ ایسی حالت میں کیسا محسوس ہوتا ہے‘۔
شاہین کے اس مضمون کے سامنے آنے کے بعد ان کی بہن عالیہ بھٹ نے بھی اس مضمون کو شیئر کرتے ہوئے شاہین کے لیے اپنے سپورٹ کا اظہار کیا۔
عالیہ نے لکھا کہ ’شاہین تم بہترین ہو، میری بہن 12 سال کی عمر سے ڈپریشن سے لڑ رہی ہے، اس نے اپنے دل کی سنی اور بغیر سوچے سمجھے سب بتایا‘۔
خیال رہے کہ بولی وڈ کی کئی اداکارائیں ڈپریشن جیسے سنگین موضوع پر بات کرتی آرہی ہیں۔
دپیکا پڈوکون نے بھی کئی سال قبل انکشاف کیا تھا کہ وہ اپنے کیریئر کے عروج پر ڈپریشن میں مبتلا تھیں، جس کے بعد اداکارہ نے ڈپریشن سے لڑنے والے افراد کے لیے لو لاو لاف نامی فاؤنڈیشن بھی بنائی۔