’کبھی خوشی کبھی غم‘ کا ٹی وی پر ریمیک
2001 میں ریلیز ہونے والی بولی وڈ کی کامیاب فلم ’کبھی خوشی کبھی غم‘ کو ڈرامے کی شکل دے کر ٹیلی ویژن پر ریلیز کرنے کا فیصلہ کرلیا گیا ہے۔
ممبئی مرر کی رپورڑ کے مطابق کئی کامیاب ڈراموں کی ہدایت کار اکتا کپور فلم ’کبھی خوشی کبھی غم‘ کی کہانی پر ڈرامہ بنا رہی ہیں۔
گزشتہ ماہ انہوں نے اپنے ٹوئٹر پر ایک ٹویٹ کے ذریعے اعلان کیا تھا کہ وہ کئی سالوں بعد ایک خاندان کی کہانی پر ڈرامہ بنا رہی ہیں جو سونی ٹی وی پر نشر ہوگا، جسے پڑھ کر شائقین کو ایسا محسوس ہوا کہ وہ فلم ’کبھی خوشی کبھی غم‘ کی کہانی سے متاثر ہوکر اس ڈرامے کو تیار کررہی ہیں۔
A family soap after years !!! Mostly done love stories recently with d backdrop of family!! This soap will air on SONY …a family that eats together stays together NOOOO a family that accepts each other stays together
— Ekta Kapoor (@ektaravikapoor) April 19, 2018
خیال رہے کہ کرن جوہر کی ہدایات میں بننے والی اس فلم میں امیتابھ بچن، شاہ رخ خان، ہریتھک روشن، جیا بچن، کاجول اور کرینہ کپور خان نے اہم کردار ادا کیے تھے۔
اس فلم پر بننے والے ڈرامے کی کاسٹ میں اب تک صرف دو اداکاروں کو سائن کیا گیا ہے۔
ڈرامے میں اداکار بیجے آنند امیتابھ بچن کا کردار ’یش وردھن رائے چند‘ ادا کرتے نظر آئیں گے، تاہم ڈراموں کی اداکارہ ایریکا فرنینڈز کا نام کاجول یا کرینہ کے کردار کے لیے سامنے آرہا ہے۔
خیال رہے کہ بیجے آنند نے 1998 کی فلم ’پیار تو ہونا ہی تھا‘ میں کاجول کے منگیتر کا کردار نبھایا تھا۔
رپورٹس کے مطابق اداکار رجت ٹوکاس اس ڈرامے میں شاہ رخ خان کا کردار ادا کرتے نظر آئیں گے۔
اس ڈرامے کا نام ’دل ہی تو ہے‘ رکھا گیا ہے، جسے دو ماہ کے بعد نشر کرنے کا فیصلہ کیا گیا۔