‘انیس برس کی عمر میں کام کے بدلے جنسی ہراسانی کا نشانہ بنایا گیا’
فلم ‘ویرے دی ویڈنگ’ میں کرینہ کپور کے مقابل مرکزی کردار ادا کرنے والے نامور اداکار سومیت ویاس کا کہنا ہے کہ 19 برس کی عمر میں شوبز انڈسٹری میں کام کے بدلے انہیں جنسی ہراسانی کا نشانہ بنایا گیا۔
بولی وڈ انڈسٹری سے جنسی ہراسانی کی ایک اور کہانی منظر عام پر آگئی اس بار فلم ‘ویرے دی ویڈنگ‘میں کرینہ کپور خان کے مقابل مرکزی کردار ادا کرنے والے نامور اداکار سومیت نے نیا پنڈورا باکس کھول دیا۔
سومیت کا کہنا تھا کہ جب میں صرف 19 سال کا تھا اور کام کی تلاش میں تھا تو میرے ساتھ یہ واقعات ہوئے جس کی وجہ سے میں سخت پریشانی میں مبتلا ہو گیا۔
انہوں نے کہا کہ اس وقت مجھے ایسا محسوس ہوا جیسے میں نے مختلف لوگوں کی جانب سے پیش کی جانے والی جنسی ہراسانی کی پیشکش ٹھکرا کر کیریئر میں آگے بڑھنے کا موقع ضائع کردیا ہے۔
ان کا یہ بھی کہنا تھا کہ اگر آپ میں قابلیت نہیں ہے تو کوئی آپ کو کام نہیں دے گا اور آپ کو کام صرف اسی وقت ملے گا جب آپ اس کے اہل ہوں گے۔
سومیت کا مزید کہنا تھا کہ کامیابی حاصل کرنے کیلئے محنت بہت ضروری ہے اگر کوئی آپ کو کام کے بدلے ہراساں کرے تو ایسی پیشکش کو بالکل بھی قبول نہ کریں بلکہ خود پر بھروسہ رکھیں۔
سومیت نے یوٹوب پر مزاحیہ ویڈیوز اپلوڈ کرکے شہرت حاصل کی۔ انہوں نے 2012 میں سری دیوی کےساتھ فلم ‘انگلش ونگلش’ میں بھی اداکاری کی اور اب کرینہ کے ساتھ فلم ‘ویرے دی ویڈنگ’ میں نظر آئیں گے۔