سلمان خان نے فلم حاصل کرنے میں کوئی مدد نہیں کی، مونی روئے

سلمان خان بالی ووڈ میں نئے چہرے متعارف کرانے کے لیے جانے جاتے ہیں فوٹو:فائل

ممبئی: نامور بالی ووڈ اداکارہ مونی روئے کا کہنا ہے کہ سلمان خان نے انہیں بالی ووڈ میں متعارف کرانے میں کوئی مدد نہیں کی بلکہ انہیں فلم’’گولڈ‘‘اپنی محنت کےنتیجے میں ملی ہے۔

بھارتی فلم انڈسٹری کے دبنگ اداکار سلمان خان بالی ووڈ میں نئے چہرے متعارف کرانے کے لیے جانے جاتے ہیں انہوں نے کئی اداکاراؤں کو فلموں میں متعارف کرایا ہے جب کہ بھارتی ٹی وی کے مشہور ڈرامے’’ناگن‘‘  کی ہیروئن مونی روئے کے بارے میں کہا جارہا ہے کہ انہیں بھی بالی ووڈ میں سلمان خان نے متعارف کرایا ہے۔

اس خبرکوبھی پڑھیں: شاہ رخ خان سے موازنہ؛ اکشے کا کرارا جواب

تاہم مونی روئےنے اس طرح کی تمام افواہوں کو رد کرتے ہوئے کہا ہے کہ وہ سلمان خان کی بے حد عزت کرتی ہیں لیکن انہیں فلموں میں متعارف کرانے کا سہرا سلمان کے سر نہیں جاتا۔ انہیں نہ ہی سلمان خان کی پروڈکشن کمپنی سے کسی کردار کی پیشکش ہوئی ہے، اور نہ ہی سلمان خان کی جانب سے کوئی کال آئی ہے بلکہ انہیں فلم ’’گولڈ‘‘ اپنی محنت سے حاصل ہوئی ہے۔

واضح رہے کہ مونی روئے بالی ووڈ کے ایکشن ہیرو اکشے کمار کے ساتھ فلم’’گولڈ‘‘میں مرکزی کرداراداکررہی ہیں، فلم آج 15 اگست کو نمائش کے لیے پیش کی جارہی ہے۔